11:12, 11 Fevral 2019 (Bazar ertəsi) 136

DTX casus əməliyyatı barədə məlumat yayıb

DTX casus əməliyyatı barədə məlumat yayıb
Dövlət Təhlükəsizliyi Xidmətinin ictimai əlaqələr şöbəsi fevralın 11-də rəsmi məlumat yayıb. 

Qeyd olunur ki, Dövlət Təhlükəsizliyi Xidmətində davam edən istintaq-əməliyyat tədbirləri zamanı Azərbaycan vətəndaşı, Mingəçevir şəhər sakini Ələkbərov Anar Vaqif oğlu dövlətə xəyanət cinayətində şübhəli şəxs qismində tutulub: "Anar Ələkbərovu 2016-cı ilin mart ayında xarici ölkə ərazisində xüsusi xidmət orqanları nümayəndələrinin maddi maraq müqabilində məxfi əməkdaşlığa cəlb etdiyi müəyyən olunub. Həmin şəxslər Anar Ələkbərova xaricdə ticarət əlaqələri olan bəzi Azərbaycan vətəndaşları barədə məlumat toplayıb, onları müxtəlif işgüzar münasibətlər zəminində xarici xüsusi xidmət orqanlarının əlaqəsinə cəlb etmək, Azərbaycanın xüsusi xidmət orqanlarının əməkdaşları və Azərbaycanda fəaliyyət göstərən konkret ölkələrin səfirliklərinin nümayəndələri, Müdafiə Nazirliyinin "N” saylı hərbi hissəsi haqqında məlumat toplamaq barədə tapşırıqlar verib.
 

Anar Ələkbərov ötən müddət ərzində bu tapşırıqların yerinə yetirilməsi istiqamətində konkret işlər görüb. Araşdırmalar zamanı Anar Ələkbərovun Azərbaycan Respublikasının dövlət təhlükəsizliyi maraqlarına zidd olaraq topladığı və gizliliyinin qorunduğunu güman etdiyi mobil internet təminatından istifadə etməklə xarici xüsusi xidmət orqanlarına ötürdüyü məlumatlar əldə edilib, iş üzrə digər çoxsaylı dəlillər toplanıb, o, cinayət əməllərini etiraf edərək təfərrüatları barədə ətraflı məlumatlar verib.

Anar Ələkbərov Cinayət Məcəlləsinin 274-cü (dövlətə xəyanət) maddəsi ilə cinayət məsuliyyətinə cəlb olunub, məhkəmənin qərarı ilə həbs edilib”.